| | 近期股市波動，雷曼迷債事件，中信i kill you later，都令好多人嚇餐死。今日匯豐銀行跌到落$75，究竟後市又如何呢？
雷曼宣佈"可能"會破產果日，我即刻就叫晒身邊既人將d mpf轉晒做最最最穩陣既保本~~ 結果過左唔夠一個月既今日，我d mpf一毫子都無蝕過，反觀其他唔轉既人，起碼唔見15%，真係聽到都驚。
既然咁好手神，梗要係呢豎鳩威下，再吹多兩野俾你地睇下究竟我呢個符碌之神有無運仔：
1. 阿爺仲未出手，即係話佢等緊，等咩呢？我估佢係等緊美國佬套現，美國佬要係年尾結算，咁由於結算期需要30日，即係話係11月15日打後d美國佬就會走晒d錢，咁中國政府就會係呢個時候採取行動，相信會刺激中資銀行股上升，受惠好有可能係3988中國銀行，以今日收市計，佢係$1.71，我估計未來幾日都會波動，加上月尾結算，有可能下試$1.5低位。如果係$1.55入，再係11月尾沽，應該可以執到d錢洗下~ 拿! 先旨聲明，我唔會買，因為呢個係我人生首個對股票既預測，我都係好無把握，現階段純粹紙上談兵。有閒錢咪搏一搏當買大細，因為買一手都係1000股，以今日個價只需要$1710 only~ 咁你問我幾時沽，我相信如果你能夠係$1.5入，佢重上$2蚊唔係難事，一來一回你可以賺$0.5一股，一手賺$500，多買多賺，升到你迷信。
2. 匯豐銀行來計，有傳佢賣鐵路又再買返其他野，如果係真既話，呢個係一個會計佬既數字遊戲，想令條數好睇d，咁即係話佢都hi左野，加上今年可能派得好少息，可能within 4厘，咁真係買唔過，買左亦唔好走，因為呢期明顯莊家玩野，你上車落車都係只會得一個result - - 被夾到跌錢。外圍基金亦好多因為要套現多數拋售5號仔，單日day trade又唔多，所以個沽壓會持續一段時間。$75都應該仲有下調空間。星期四30號，應該可以見真章~~
3. 外匯方面，因為年尾結算要用美金，始終美金係現行經濟體系既核心貨幣，所以美國佬咁夠薑印銀紙，其他國家又吹佢唔漲。係大圍仆街底下，可能到年尾d外匯都會持續偏軟，過年後應該d外匯會回少少，2-3月美國佬要係日本交稅，日元會再夾上去，所以日本仔今次真係強大了。我個人認為唔好買日元，因為無可能日本仔唔出招壓住d日元，所以遲d啦，過左年1月頭可能係入yen好時機~~
4. 樓市雖然跌左20%，但係仲未見底，估計農歷年後有個小陽春，跟住會升少少，之後會插一野好深，跟住就係大家期待已久既牛牛時間，所以最好就係出年3-6月買係最抵。不過小心做唔到mortgage，不過銀行始終要借錢出去先賺，所以唔需要太貪心，努力工作保住自己份工就無問題。
以上所講既野全部係個人意見，本人亦唔會參與，即管睇下我預測有無d錯。口講口賠，輸左唔好賴我~~ hoho~~
|
| | Posted 10/27/2008 11:40 PM - 7 Views - 0 eProps - 0 comments
- recommend
  - recs0
- share
- email
 - sent0
|
